میں واقف کار اسرار بقا ہوں

میں واقف کار اسرار بقا ہوں

اسی خاطر تو ان پر مر مٹا ہوں

یہ میری انتہائے آرزو دیکھ

کہ میں تجھ سے تجھی کو مانگتا ہوں

سنی جاتی نہیں جو ہوں وہ فریاد

جو رد کر دی گئی وہ التجا ہوں

کوئی ناحق جفائیں کیوں سہے گا

مگر میں ہوں کہ مجبور وفا ہوں

روا ہے یا یہ سجدہ ناروا ہے

کسی کے آستاں پر گر پڑا ہوں

وہ اپنے حسن کی اک داستاں ہیں

میں اپنے عشق کا اک ماجرا ہوں

کہیں ہوتے بھی ہیں سینے میں دو دل

میں جس کو چاہتا ہوں چاہتا ہوں