main waqt ki aabju se aage nikal gaya hun

maiñ vaqt kī aabjū se aage nikal gayā huuñ

so dahr kī hā-o-hū se aage nikal gayā huuñ

maiñ be-sharī.at tahāratoñ kī talāsh meñ thā

maiñ bā-sharī.at vuzū se aage nikal gayā huuñ

tū jāntā hai ki merā vijdān vajd meñ hai

tū jāntā hai maiñ tū se aage nikal gayā huuñ

maiñ raqs karte hue tahajjud kī sā.atoñ meñ

ibādatoñ ke ġhulū se aage nikal gayā huuñ

na-jāne kis kā.enāt meñ paaoñ rakh diye haiñ

maiñ rāt-din kī numū se aage nikal gayā huuñ

abas haiñ sab ālam-e-tahayyur mirī nazar meñ

maiñ ālam-e-justujū se aage nikal gayā huuñ

maiñ is jahān-e-qabā-darīda kā baḳhiya-gar thā

magar maiñ kār-e-rafū se aage nikal gayā huuñ

mujhe na.ī shakl kī zamīñ par hai baat karnī

maiñ baizavī guftugū se aage nikal gayā huuñ

mirī ajal kī bhī maut ījād ho ga.ī hai

maiñ saañs lete lahū se aage nikal gayā huuñ

mujhe nahīñ apne raḳht-e-hastī kī fikr 'vāsif'

maiñ hast kī aarzū se aage nikal gayā huuñ

main waqt ki aabju se aage nikal gaya hun

so dahr ki ha-o-hu se aage nikal gaya hun

main be-shariat tahaaraton ki talash mein tha

main ba-shariat wuzu se aage nikal gaya hun

tu jaanta hai ki mera wijdan wajd mein hai

tu jaanta hai main tu se aage nikal gaya hun

main raqs karte hue tahajjud ki saaton mein

ibaadaton ke ghulu se aage nikal gaya hun

na-jaane kis kaenat mein paon rakh diye hain

main raat-din ki numu se aage nikal gaya hun

abas hain sab aalam-e-tahayyur meri nazar mein

main aalam-e-justuju se aage nikal gaya hun

main is jahan-e-qaba-darida ka baKHiya-gar tha

magar main kar-e-rafu se aage nikal gaya hun

mujhe nai shakl ki zamin par hai baat karni

main baizawi guftugu se aage nikal gaya hun

meri ajal ki bhi maut ijad ho gai hai

main sans lete lahu se aage nikal gaya hun

mujhe nahin apne raKHt-e-hasti ki fikr 'wasif'

main hast ki aarzu se aage nikal gaya hun