main wo dariya hun chaDha ho jo utarne ke liye
maiñ vo dariyā huuñ chaḌhā ho jo utarne ke liye
jī rahā huuñ maiñ yahāñ ham-zād marne ke liye
chā.e-ḳhāne kī nashistoñ par jarīdoñ ke varaq
peḌ se patte jhaḌe uḌne bikharne ke liye
ek maiñ madd-e-muqābil vus.at-e-āfāq meñ
aur saarī tāqateñ gumrāh karne ke liye
hāfiza vīrān hone ke liye ābād thā
naam kuchh hoñToñ pe aa.e the bisarne ke liye
kār-ḳhānoñ ko chale amboh-dar-amboh log
jānvar nikle charāgāhoñ meñ charne ke liye
raushnī meñ ḳhauf kā ehsās tak hotā nahīñ
kar diyā hai off Teble-lamp Darne ke liye
main wo dariya hun chaDha ho jo utarne ke liye
ji raha hun main yahan ham-zad marne ke liye
chae-KHane ki nashiston par jaridon ke waraq
peD se patte jhaDe uDne bikharne ke liye
ek main madd-e-muqabil wusat-e-afaq mein
aur sari taqaten gumrah karne ke liye
hafiza viran hone ke liye aabaad tha
nam kuchh honTon pe aae the bisarne ke liye
kar-KHanon ko chale amboh-dar-amboh log
jaanwar nikle charagahon mein charne ke liye
raushni mein KHauf ka ehsas tak hota nahin
kar diya hai off Teble-lamp Darne ke liye
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
