main wo shaer hun jo shahon ka sana-KHwan na hua

maiñ vo shā.er huuñ jo shāhoñ kā sanā-ḳhvāñ na huā

ye hai vo jurm jo mujh se kisī unvāñ na huā

is gunah par mirī ik umr añdhere meñ kaTī

mujh se is maut ke mele meñ charāġhāñ na huā

kal jahāñ phuul khile jashn hai zaḳhmoñ kā vahāñ

dil vo gulshan hai ujaḌ kar bhī jo vīrāñ na huā

āñkheñ kuchh aur dikhātī haiñ magar zehn kuchh aur

baaġh mahke magar ehsās-e-bahārāñ na huā

yuuñ to har daur meñ girte rahe insān ke nirḳh

in ġhulāmoñ meñ koī yūsuf-e-kan.āñ na huā

maiñ ḳhud āsūda huuñ kam-kosh huuñ yā pathar huuñ

zaḳhm khā ke bhī mujhe dard kā irfāñ na huā

saarī duniyā mutalātim nazar aatī hai 'nadīm'

mujh pe ik tanz huā rauzan-e-zindāñ na huā

main wo shaer hun jo shahon ka sana-KHwan na hua

ye hai wo jurm jo mujh se kisi unwan na hua

is gunah par meri ek umr andhere mein kaTi

mujh se is maut ke mele mein charaghan na hua

kal jahan phul khile jashn hai zaKHmon ka wahan

dil wo gulshan hai ujaD kar bhi jo viran na hua

aankhen kuchh aur dikhati hain magar zehn kuchh aur

bagh mahke magar ehsas-e-bahaaran na hua

yun to har daur mein girte rahe insan ke nirKH

in ghulamon mein koi yusuf-e-kanan na hua

main KHud aasuda hun kam-kosh hun ya pathar hun

zaKHm kha ke bhi mujhe dard ka irfan na hua

sari duniya mutalatim nazar aati hai 'nadim'

mujh pe ek tanz hua rauzan-e-zindan na hua