میں یہ کب کہتا ہوں کمبخت انہیں یاد نہ کر

میں یہ کب کہتا ہوں کمبخت انہیں یاد نہ کر

شیون و آہ مگر اے دل ناشاد نہ کر

درد سینے میں نہاں رہ کے اثر رکھتا ہے

ہم نشیں تک سے بیاں حسن کی بیداد نہ کر

اپنی آنکھوں کو نہ خوں نابہ فشاں ہونے دے

مفت میں لعل خدا داد کو برباد نہ کر

پھونک دے نغمۂ جاں سوز سے سامان قفس

بلبل تفتہ جگر شکوۂ صیاد نہ کر

لطف جینے کا ہے جب ہی کہ دل مست خودی

آسماں تک سے یہ کہہ دے مری امداد نہ کر

عقل و جذبات کو رکھ تابع فرماں اپنے

اس کو سر پر نہ چڑھا اور انہیں آزاد نہ کر

یاس میں پھوڑ کے سر مرتے ہیں کم ظرف امیںؔ

ظرف عالی ہے ترا بیعت فرہاد نہ کر