main ye kab kahta hun kambaKHt unhen yaad na kar

maiñ ye kab kahtā huuñ kambaḳht unheñ yaad na kar

shevan-o-āh magar ai dil-e-nāshād na kar

dard siine meñ nihāñ rah ke asar rakhtā hai

ham-nashīñ tak se bayāñ husn kī bedād na kar

apnī āñkhoñ ko na ḳhūñ-nāba-fashāñ hone de

muft meñ lāl-e-ḳhudā-dād ko barbād na kar

phūñk de naġhma-e-jāñ-soz se sāmān-e-qafas

bulbul-e-tafta-jigar shikva-e-sayyād na kar

lutf jiine kā hai jab hī ki dil-e-mast-e-ḳhudī

āsmāñ tak se ye kah de mirī imdād na kar

aql-o-jazbāt ko rakh tāba-e-farmāñ apne

is ko sar par na chaḌhā aur inheñ āzād na kar

yaas meñ phoḌ ke sar marte haiñ kam-zarf 'amīñ'

zarf aalī hai tirā bai'at-e-farhād na kar

main ye kab kahta hun kambaKHt unhen yaad na kar

shewan-o-ah magar ai dil-e-nashad na kar

dard sine mein nihan rah ke asar rakhta hai

ham-nashin tak se bayan husn ki bedad na kar

apni aankhon ko na KHun-naba-fashan hone de

muft mein lal-e-KHuda-dad ko barbaad na kar

phunk de naghma-e-jaan-soz se saman-e-qafas

bulbul-e-tafta-jigar shikwa-e-sayyaad na kar

lutf jine ka hai jab hi ki dil-e-mast-e-KHudi

aasman tak se ye kah de meri imdad na kar

aql-o-jazbaat ko rakh taba-e-farman apne

is ko sar par na chaDha aur inhen aazad na kar

yas mein phoD ke sar marte hain kam-zarf 'amin'

zarf aali hai tera bai'at-e-farhad na kar