main ye nahin kahti ki mujhe yaad kiya kar

maiñ ye nahīñ kahtī ki mujhe yaad kiyā kar

chup-chāp barastī huī bārish ko sunā kar

dastak mire darvāze pe mat aise diyā kar

sau baar kahā hai ki havā dhīre chalā kar

kahtā hai ye ā.īna mujhe nazreñ churā kar

nam-dīda mujhe dekh ke mat aise hañsā kar

ho jaa.e na kuchh aur udāsī meñ izāfa

tū ḳhud se mirī maan zarā kam hī milā kar

sargoshī na kar aise havā kaan meñ mere

tū lahje meñ us ke na mirā naam liyā kar

jaarī ho mire siine meñ sāñsoñ kā tasalsul

rakh haath mire Thahre hue qalb pe aa kar

phir dil meñ tire naam kī paḌtī haiñ dhamāleñ

hotī hai mirī ruuh bhī ḳhush ḳhaak uḌā kar

ghūñghaT kabhī chehre se uThāte hī nahīñ ho

milte ho kahīñ saare hijābāt uThā kar

kartā hai vo phir raqs sar-e-bazm musalsal

rakh dete ho zī-hosh ko dīvāna banā kar

sūraj ko bujhā dete ho tum shaam se pahle

aur dil se ye kahte ho ki din-rāt jalā kar

lagtā hai kabhī duur bahut duur ho mujh se

lagtā hai ki chhū lūñgī kabhī haath baḌhā kar

maiñ chādar-e-tathīr kā detī huuñ vasīla

rakh lenā mire 'aiboñ ko duniyā se chhupā kar

auqāt bhī miTTī hai tirī zaat bhī miTTī

tū ḳhaak hai mat ḳhaak pe itrā ke chalā kar

aa.egā bhalā kaun tire pīchhe ai pāgal

mat rāhoñ meñ 'jīnā' tū ThiThak kar yuuñ rukā kar

main ye nahin kahti ki mujhe yaad kiya kar

chup-chap barasti hui barish ko suna kar

dastak mere darwaze pe mat aise diya kar

sau bar kaha hai ki hawa dhire chala kar

kahta hai ye aaina mujhe nazren chura kar

nam-dida mujhe dekh ke mat aise hansa kar

ho jae na kuchh aur udasi mein izafa

tu KHud se meri man zara kam hi mila kar

sargoshi na kar aise hawa kan mein mere

tu lahje mein us ke na mera nam liya kar

jari ho mere sine mein sanson ka tasalsul

rakh hath mere Thahre hue qalb pe aa kar

phir dil mein tere nam ki paDti hain dhamalen

hoti hai meri ruh bhi KHush KHak uDa kar

ghunghaT kabhi chehre se uThate hi nahin ho

milte ho kahin sare hijabaat uTha kar

karta hai wo phir raqs sar-e-bazm musalsal

rakh dete ho zi-hosh ko diwana bana kar

suraj ko bujha dete ho tum sham se pahle

aur dil se ye kahte ho ki din-raat jala kar

lagta hai kabhi dur bahut dur ho mujh se

lagta hai ki chhu lungi kabhi hath baDha kar

main chadar-e-tathir ka deti hun wasila

rakh lena mere 'aibon ko duniya se chhupa kar

auqat bhi miTTi hai teri zat bhi miTTi

tu KHak hai mat KHak pe itra ke chala kar

aaega bhala kaun tere pichhe ai pagal

mat rahon mein 'jina' tu ThiThak kar yun ruka kar