main zard aag na pani ke sard Dar mein raha

maiñ zard aag na paanī ke sard Dar meñ rahā

rahā to soī huī ḳhaak ke ḳhatar meñ rahā

vo gard-bād ki dil kī zabāñ kā zā.iqa hai

nazar-ufuq pe huvaidā huā na sar meñ rahā

ki shāmil is meñ mirī larzish-e-ḳhayāl bhī thī

jo asl chhoḌ ke maiñ aks ke asar meñ rahā

tire libās pe ho us kī vāpsī kī chamak

jo ek umr tire ḳhuun ke asar meñ rahā

ghirā thā chāroñ taraf dhoḌ kī qanāt sā maiñ

magan zamāna kisī naqsh-e-tar-ba-tar meñ rahā

us ek lamhe kī gum-gashtagī pe ḳhush haiñ sabhī

jo hashr ban ke mire sañg-e-be-sharar meñ rahā

ye shahr zinda hai lekin har ek lafz kī laash

jahāñ kahīñ se uThī shor mere ghar meñ rahā

chapātiyāñ thiiñ bañdhī peT par magar shab-bhar

ubhartā Dūbtā maiñ bhuuk ke bhañvar meñ rahā

kahāñ se kaise kise kaun le uḌā thā 'zafar'

jo aadhī raat ko raulā sā dasht o dar meñ rahā

main zard aag na pani ke sard Dar mein raha

raha to soi hui KHak ke KHatar mein raha

wo gard-baad ki dil ki zaban ka zaiqa hai

nazar-ufuq pe huwaida hua na sar mein raha

ki shamil is mein meri larzish-e-KHayal bhi thi

jo asl chhoD ke main aks ke asar mein raha

tere libas pe ho us ki wapsi ki chamak

jo ek umr tere KHun ke asar mein raha

ghira tha chaaron taraf dhoD ki qanat sa main

magan zamana kisi naqsh-e-tar-ba-tar mein raha

us ek lamhe ki gum-gashtagi pe KHush hain sabhi

jo hashr ban ke mere sang-e-be-sharar mein raha

ye shahr zinda hai lekin har ek lafz ki lash

jahan kahin se uThi shor mere ghar mein raha

chapatiyan thin bandhi peT par magar shab-bhar

ubharta Dubta main bhuk ke bhanwar mein raha

kahan se kaise kise kaun le uDa tha 'zafar'

jo aadhi raat ko raula sa dasht o dar mein raha