میں ذوق عبادت میں سجدوں سے نہیں واقف

میں ذوق عبادت میں سجدوں سے نہیں واقف

یا لوح و قلم واقف یا میری جبیں واقف

خامی کا کبھی یوں ہی احساس نہیں ہوتا

ٹھوکر نہ لگے جب تک ہم ہوتے نہیں واقف

درویشوں میں ہوتے ہیں کچھ اہل کرامت بھی

تم خاک نشینوں کی عظمت سے نہیں واقف

چہرے پہ نیا چہرہ ہم لوگ لگاتے کیوں

ہو جاتے اگر اصلی چہرے سے کہیں واقف

یہ علم رہا کس کو یہ پھول کھلے کیسے

ہے میری عرق ریزی یا سخت زمیں واقف

الفاظ کے شیشوں میں کیا عکس اتاریں ہم

جذبات کی شدت سے الفاظ نہیں واقف

خوبی سے نگینوں کی انجان ہیں ہم بیدلؔ

ہیرا ہے کہ پتھر ہے ہم اس سے نہیں واقف