main zauq-e-‘ibaadat mein sajdon se nahin waqif

maiñ zauq-e-‘ibādat meñ sajdoñ se nahīñ vāqif

yā lauh-o-qalam vāqif yā merī jabīñ vāqif

ḳhāmī kā kabhī yuuñ hī ehsās nahīñ hotā

Thokar na lage jab tak ham hote nahīñ vāqif

darveshoñ meñ hote haiñ kuchh ahl-e-karāmat bhī

tum ḳhāk-nashīnoñ kī 'azmat se nahīñ vāqif

chehre pe nayā chehra ham log lagāte kyoñ

ho jaate agar aslī chehre se kahīñ vāqif

ye 'ilm rahā kis ko ye phuul khile kaise

hai merī ‘araq-rezī yā saḳht zamīñ vāqif

alfāz ke shīshoñ meñ kyā 'aks utāreñ ham

jazbāt kī shiddat se alfāz nahīñ vāqif

ḳhūbī se nagīnoñ kī anjān haiñ ham 'bedil'

hiirā hai ki patthar hai ham is se nahīñ vāqif

main zauq-e-‘ibaadat mein sajdon se nahin waqif

ya lauh-o-qalam waqif ya meri jabin waqif

KHami ka kabhi yun hi ehsas nahin hota

Thokar na lage jab tak hum hote nahin waqif

darweshon mein hote hain kuchh ahl-e-karamat bhi

tum KHak-nashinon ki 'azmat se nahin waqif

chehre pe naya chehra hum log lagate kyon

ho jate agar asli chehre se kahin waqif

ye 'ilm raha kis ko ye phul khile kaise

hai meri ‘araq-rezi ya saKHt zamin waqif

alfaz ke shishon mein kya 'aks utaren hum

jazbaat ki shiddat se alfaz nahin waqif

KHubi se naginon ki anjaan hain hum 'bedil'

hira hai ki patthar hai hum is se nahin waqif