main zer-e-saya kahin mahw-e-KHwab tha bhi nahin

maiñ zer-e-sāya kahīñ mahv-e-ḳhvāb thā bhī nahīñ

ki aa ke dhuup jagātī maiñ jāgtā bhī nahīñ

harīm-e-nāz mirī dastaras se duur to hai

mire jahān-e-taḳhayyul se māvarā bhī nahīñ

yahī hai adl to aise nizām-e-adl pe ḳhaak

hai fard-e-jurm bhī aa.ed mirī ḳhatā bhī nahīñ

ham apnī jaan ke dushman ko apnā dost kaheñ

hamāre paas koī aur rāsta bhī nahīñ

ham aa ke apne gharoñ meñ sukūñ se baiTh ga.e

ba.īñ-hama koī ḳhatra abhī Talā bhī nahīñ

kahāñ pe laa.ī hai ye shab-gazīdgī ham ko

charāġh bujh bhī ga.e mushta.il havā bhī nahīñ

asā ko Daal deñ dariyā meñ rāsta ho jaa.e

hamāre paas koī aisā mo.ajiza bhī nahīñ

isī jahān meñ 'aḳhlāq' aise log bhī haiñ

jo nek bhī haiñ aur un kā koī ḳhudā bhī nahīñ

main zer-e-saya kahin mahw-e-KHwab tha bhi nahin

ki aa ke dhup jagati main jagta bhi nahin

harim-e-naz meri dastaras se dur to hai

mere jahan-e-taKHayyul se mawara bhi nahin

yahi hai adl to aise nizam-e-adl pe KHak

hai fard-e-jurm bhi aaed meri KHata bhi nahin

hum apni jaan ke dushman ko apna dost kahen

hamare pas koi aur rasta bhi nahin

hum aa ke apne gharon mein sukun se baiTh gae

bain-hama koi KHatra abhi Tala bhi nahin

kahan pe lai hai ye shab-gazidgi hum ko

charagh bujh bhi gae mushtail hawa bhi nahin

asa ko Dal den dariya mein rasta ho jae

hamare pas koi aisa moajiza bhi nahin

isi jahan mein 'aKHlaq' aise log bhi hain

jo nek bhi hain aur un ka koi KHuda bhi nahin