majbur hun gunah kiye ja raha hun main

majbūr huuñ gunāh kiye jā rahā huuñ maiñ

fard-e-amal siyāh kiye jā rahā huuñ maiñ

go jāntā bhī huuñ tirā milnā muhāl hai

is par bhī terī chaah kiye jā rahā huuñ maiñ

terā fareb-e-va.ada bahut kāmyāb hai

āñkhoñ ko farsh-e-rāh kiye jā rahā huuñ maiñ

taqsīm ho rahī hai mirī vus.at-e-nazar

zarroñ ko mehr-o-māh kiye jā rahā huuñ maiñ

terā karam hī is kā muharrik na ho kahīñ

kyā jaane kyuuñ gunāh kiye jā rahā huuñ maiñ

mujh ko ḳhabar hai shaiḳh tujhe kuchh ḳhabar nahīñ

kyuuñ zindagī tabāh kiye jā rahā huuñ maiñ

'sīmāb' diin se bhī mire dil ko ishq hai

duniyā se bhī nibāh kiye jā rahā huuñ maiñ

majbur hun gunah kiye ja raha hun main

fard-e-amal siyah kiye ja raha hun main

go jaanta bhi hun tera milna muhaal hai

is par bhi teri chah kiye ja raha hun main

tera fareb-e-wada bahut kaamyab hai

aankhon ko farsh-e-rah kiye ja raha hun main

taqsim ho rahi hai meri wusat-e-nazar

zarron ko mehr-o-mah kiye ja raha hun main

tera karam hi is ka muharrik na ho kahin

kya jaane kyun gunah kiye ja raha hun main

mujh ko KHabar hai shaiKH tujhe kuchh KHabar nahin

kyun zindagi tabah kiye ja raha hun main

'simab' din se bhi mere dil ko ishq hai

duniya se bhi nibah kiye ja raha hun main