majbur to bahut hain mohabbat mein ji se hum

majbūr to bahut haiñ mohabbat meñ jī se ham

ye aur baat hai na kaheñ kuchh kisī se ham

ik shaam ham-suḳhan the chaman meñ kalī se ham

yādash-ba-ḳhair phir na mile zindagī se ham

allāh re vo vaqt vo majbūrī-e-hayāt

ro ro ke ho rahe the judā jab kisī se ham

taklīf-e-iltifāt na kar ai nigāh-e-nāz

ab mutma.in haiñ apne ġham-e-zindagī se ham

haiñ yaad us nazar kī taġhāful-shi.āriyāñ

bā-vasf-e-irtibāt bhī the ajnabī se ham

baḌhtī hī jā rahī haiñ abas bad-gumāniyāñ

nā-āshnā nahīñ haiñ tirī barhamī se ham

ek ik adā-e-husn-e-gurezāñ nazar meñ hai

pāmāl ho rahe haiñ baḌī be-ruḳhī se ham

har-sū hai ek ālam-e-vahshat shab-e-firāq

ghabrā rahe haiñ silsila-e-tīrgī se ham

ġhārat kiyā hai jis ne hamārā sukūn-e-dil

'muztar' sukūn-e-dil ke haiñ ḳhvāhāñ usī se ham

majbur to bahut hain mohabbat mein ji se hum

ye aur baat hai na kahen kuchh kisi se hum

ek sham ham-suKHan the chaman mein kali se hum

yaadash-ba-KHair phir na mile zindagi se hum

allah re wo waqt wo majburi-e-hayat

ro ro ke ho rahe the juda jab kisi se hum

taklif-e-iltifat na kar ai nigah-e-naz

ab mutmain hain apne gham-e-zindagi se hum

hain yaad us nazar ki taghaful-shiariyan

ba-wasf-e-irtibaat bhi the ajnabi se hum

baDhti hi ja rahi hain abas bad-gumaniyan

na-ashna nahin hain teri barhami se hum

ek ek ada-e-husn-e-gurezan nazar mein hai

pamal ho rahe hain baDi be-ruKHi se hum

har-su hai ek aalam-e-wahshat shab-e-firaq

ghabra rahe hain silsila-e-tirgi se hum

ghaarat kiya hai jis ne hamara sukun-e-dil

'muztar' sukun-e-dil ke hain KHwahan usi se hum