majlis-e-gham, na koi bazm-e-tarab, kya karte

majlis-e-ġham, na koī bazm-e-tarab, kyā karte

ghar hī jā sakte the āvāra-e-shab, kyā karte

ye to achchhā kyā tanhā.ī kī 'ādat rakkhī

tab use chhoḌ diyā hotā to ab kyā karte

raushnī, rañg, mahak, tā.ir-e-ḳhush-lahn, sabā

tū na aatā jo chaman meñ to ye sab kyā karte

dil kā ġham dil meñ liye lauT ga.e ham chup-chāp

koī suntā hī na thā shor-o-shaġhab kyā karte

baat karne meñ hameñ kaun sī dushvārī thī

us kī āñkhoñ se taḳhātub thā so lab kyā karte

kuchh kyā hotā to phir zo'm bhī achchhā lagtā

ham ziyāñ-kār the, elān-e-nasab kyā karte

dekh kar tujh ko sirhāne tire bīmār-e-junūñ

jāñ-ba-lab the, so hue āh-ba-lab kyā karte

tū ne dīvānoñ se muñh moḌ liyā, Thiik kyā

in kā kuchh Thiik nahīñ thā ki ye kab kyā karte

jo suḳhan-sāz churāte haiñ mirā tarz-e-suḳhan

un kā apnā na koī taur, na Dhab, kyā karte

yahī honā thā jo 'irfān' tire saath huā

munkir-e-'mīr' bhalā terā adab kyā karte

majlis-e-gham, na koi bazm-e-tarab, kya karte

ghar hi ja sakte the aawara-e-shab, kya karte

ye to achchha kya tanhai ki 'adat rakkhi

tab use chhoD diya hota to ab kya karte

raushni, rang, mahak, tair-e-KHush-lahn, saba

tu na aata jo chaman mein to ye sab kya karte

dil ka gham dil mein liye lauT gae hum chup-chap

koi sunta hi na tha shor-o-shaghab kya karte

baat karne mein hamein kaun si dushwari thi

us ki aankhon se taKHatub tha so lab kya karte

kuchh kya hota to phir zo'm bhi achchha lagta

hum ziyan-kar the, elan-e-nasab kya karte

dekh kar tujh ko sirhane tere bimar-e-junun

jaan-ba-lab the, so hue aah-ba-lab kya karte

tu ne diwanon se munh moD liya, Thik kya

in ka kuchh Thik nahin tha ki ye kab kya karte

jo suKHan-saz churaate hain mera tarz-e-suKHan

un ka apna na koi taur, na Dhab, kya karte

yahi hona tha jo 'irfan' tere sath hua

munkir-e-'mir' bhala tera adab kya karte