مجلس ہجر تھی سینہ جلتا رہا

مجلس ہجر تھی سینہ جلتا رہا

گریہ ہوتا رہا بین چلتا رہا

تا فلک جسم کے سایہ لرزاں رہے

کیسا ہیجان سانسوں میں پلتا رہا

یاد دل میں بھنور سا بناتی رہی

درد صحرا تھا آنکھوں میں جلتا رہا

گم تھی ام وجود اور طفل عدم

وقت کے پالنے میں مچلتا رہا

کیسا غارت گر حسن تھا تیرا عشق

سارے منظر پہ کالک سی ملتا رہا

ایک تیری چمک تھی سوا اور سوا

میرے سورج کو ڈھلنا تھا ڈھلتا رہا

تا سحر غم کدے میں ترا نور تھا

تا سحر ذکر چلتا نکلتا رہا