مکان دیتا کہاں تھا امان مٹی کا

مکان دیتا کہاں تھا امان مٹی کا

مکین چھوڑ گئے یہ جہان مٹی کا

نا جانے کونسی بارش بہا کے لے جائے

کھڑا ہوں سر پہ لئے سائباں مٹی کا

زمیں کو تنگ سمجھتے ہو کس لئے اتنا

یہ شکر ہے کہ نہیں آسمان مٹی کا

تمہارے لمس کی خوشبو ہے آج تک اس میں

مہک رہا ہے ابھی پھول دان مٹی کا

بکھر رہا ہوں ہوا میں کچھ اس طرح اب تو

بدن پہ ہونے لگا ہے گمان مٹی کا

میں ڈر رہا ہوں کہ مایوس ہی نہ ہو اظہرؔ

کہ لے رہا ہے کوئی امتحان مٹی کا