makan hai kisi ka sukunat kisi ki

makāñ hai kisī kā sukūnat kisī kī

mirā dil hai aur hai mohabbat kisī kī

jo vāqif nahīñ ḳhud haqīqat se apnī

vo kyā ḳhaak jaane haqīqat kisī kī

yahāñ ek muhtāj hai dūsre kā

yahāñ hai kisī ko zarūrat kisī kī

idhar ham pe zulm-o-sitam TūTte haiñ

udhar hai kisī par 'ināyat kisī kī

jo honī hai vo ho ke rahtī hai ik din

chalī hai kahāñ pesh-e-qismat kisī kī

sabab kyā hai vo mehr se dekhte haiñ

samajhtā huuñ aa.ī hai shāmat kisī kī

bure se burā hai vo merī nazar meñ

jo insān kartā hai ġhībat kisī kī

ḳhudā ne hameñ dī hai aisī tabī'at

ki dekhī na jaatī hai aafat kisī kī

zabāñ apnī qaabū meñ rakkhī na jaa.e

to jaatī hai 'izzat kī 'izzat kisī kī

hazāroñ meñ do ek aise bhī hoñge

kisī kī sī hogī shabāhat kisī kī

na jab tak ho qaul-o-'amal meñ tatābuq

karegī asar kyā nasīhat kisī kī

karo justujū apnī manzil milegī

na bekār jaatī hai mehnat kisī kī

yahī hotī aa.ī hai bazm-e-jahāñ meñ

hai aamad kisī kī to ruḳhsat kisī kī

nahīñ imtiyāz-e-bad-o-nek mushkil

Tapaktī hai sūrat se sīrat kisī kī

na tan hai hamārā na jaañ hai hamārī

ye sab kuchh hai 'bartar' amānat kisī kī

makan hai kisi ka sukunat kisi ki

mera dil hai aur hai mohabbat kisi ki

jo waqif nahin KHud haqiqat se apni

wo kya KHak jaane haqiqat kisi ki

yahan ek muhtaj hai dusre ka

yahan hai kisi ko zarurat kisi ki

idhar hum pe zulm-o-sitam TuTte hain

udhar hai kisi par 'inayat kisi ki

jo honi hai wo ho ke rahti hai ek din

chali hai kahan pesh-e-qismat kisi ki

sabab kya hai wo mehr se dekhte hain

samajhta hun aai hai shamat kisi ki

bure se bura hai wo meri nazar mein

jo insan karta hai ghibat kisi ki

KHuda ne hamein di hai aisi tabi'at

ki dekhi na jati hai aafat kisi ki

zaban apni qabu mein rakkhi na jae

to jati hai 'izzat ki 'izzat kisi ki

hazaron mein do ek aise bhi honge

kisi ki si hogi shabahat kisi ki

na jab tak ho qaul-o-'amal mein tatabuq

karegi asar kya nasihat kisi ki

karo justuju apni manzil milegi

na bekar jati hai mehnat kisi ki

yahi hoti aai hai bazm-e-jahan mein

hai aamad kisi ki to ruKHsat kisi ki

nahin imtiyaz-e-bad-o-nek mushkil

Tapakti hai surat se sirat kisi ki

na tan hai hamara na jaan hai hamari

ye sab kuchh hai 'bartar' amanat kisi ki