مکاں سے چل کے آئی لا مکاں تک

مکاں سے چل کے آئی لا مکاں تک

مری آوارگی پہنچی کہاں تک

نہ حرف آرزو آیا زباں تک

کہ درماندہ کوئی چلتا کہاں تک

کلینر سے مدیر پاسباں تک

کہاں سے چل کے آیا ہوں کہاں تک

نظر آتا نہیں تم سا جہاں میں

پہنچتی ہے نظر میری جہاں تک

زمیں سے اٹھ کھڑا جو عزم لے کر

پہنچتا ہے وہ ذرہ آسماں تک

جو میر کارواں سمجھے تھے خود کو

وہی پہنچے ہیں گرد کارواں تک

زباں دانتوں تلے ہم نے دبا لی

جو حرف آرزو آیا زباں تک

خوشی سے جبر جابر آزما لیں

مرے لب پر اگر آئی فغاں تک

نہ جانے کس جگہ میں آ گیا ہوں

نہیں ملتا ہے رستے کا نشاں تک

نشے میں کر تو لی ہے میں نے توبہ

نہ پہنچے بات یہ پیر مغاں تک

امرؔ ہے یہ محبت یا تجارت

اگر بات آ گئی سود و زیاں تک