makan se chal ke aai la-makan tak

makāñ se chal ke aa.ī lā-makāñ tak

mirī āvārgī pahuñchī kahāñ tak

na harf-e-ārzū aayā zabāñ tak

ki darmāñda koī chaltā kahāñ tak

cleaner se mudīr-e-pāsbāñ tak

kahāñ se chal ke aayā huuñ kahāñ tak

nazar aatā nahīñ tum sā jahāñ meñ

pahuñchtī hai nazar merī jahāñ tak

zamīñ se uTh khaḌā jo 'azm le kar

pahuñchtā hai vo zarra āsmāñ tak

jo mīr-e-kārvāñ samjhe the ḳhud ko

vahī pahuñche haiñ gard-e-kārvāñ tak

zabāñ dāñtoñ tale ham ne dabā lī

jo harf-e-ārzū aayā zabāñ tak

ḳhushī se jabr jābir aazmā leñ

mire lab par agar aa.ī fuġhāñ tak

na jaane kis jagah maiñ aa gayā huuñ

nahīñ miltā hai raste kā nishāñ tak

nashe meñ kar to lī hai maiñ ne tauba

na pahuñche baat ye pīr-e-muġhāñ tak

'amar' hai ye mohabbat yā tijārat

agar baat aa ga.ī sūd-o-ziyāñ tak

makan se chal ke aai la-makan tak

meri aawargi pahunchi kahan tak

na harf-e-arzu aaya zaban tak

ki darmanda koi chalta kahan tak

cleaner se mudir-e-pasban tak

kahan se chal ke aaya hun kahan tak

nazar aata nahin tum sa jahan mein

pahunchti hai nazar meri jahan tak

zamin se uTh khaDa jo 'azm le kar

pahunchta hai wo zarra aasman tak

jo mir-e-karwan samjhe the KHud ko

wahi pahunche hain gard-e-karwan tak

zaban danton tale hum ne daba li

jo harf-e-arzu aaya zaban tak

KHushi se jabr jabir aazma len

mere lab par agar aai fughan tak

na jaane kis jagah main aa gaya hun

nahin milta hai raste ka nishan tak

nashe mein kar to li hai main ne tauba

na pahunche baat ye pir-e-mughan tak

'amar' hai ye mohabbat ya tijarat

agar baat aa gai sud-o-ziyan tak