makan se la-makan tak aa gae hain

makāñ se lā-makāñ tak aa ga.e haiñ

kahāñ se ham kahāñ tak aa ga.e haiñ

jahāñ jalte haiñ par hosh-o-ḳhirad ke

junūñ meñ ham vahāñ tak aa ga.e haiñ

bhaḌak uTThī hai kaisī ātish-e-gul

sharāre āshiyāñ tak aa ga.e haiñ

ḳhulūs-e-dostī par marne vaale

hayāt-e-jāvidāñ tak aa ga.e haiñ

hamārī gum-rahī manzil nishāñ hai

tajassus meñ kahāñ tak aa ga.e haiñ

vahāñ dil meñ mohabbat kī kamī hai

jahāñ shikve zabāñ tak aa ga.e haiñ

tamāshā-e-bahār-e-gul kī shaidā

bahār-e-gul-ruḳhāñ tak aa ga.e haiñ

maqām apnā nahīñ ma.alūm lekin

jahāñ tum ho vahāñ tak aa ga.e haiñ

kisī ke jalva-hā-e-hairat-angez

nazar ke imtihāñ tak aa ga.e haiñ

na pahuñche ḳhāna-e-dil ke makīñ tak

zamīñ se āsmāñ tak aa ga.e haiñ

guzar kar ham ḳhudī vahm-o-gumāñ se

ḳhudā jaane kahāñ tak aa ga.e haiñ

'rishī' manzil nahīñ ab duur ham se

ġhubār-e-kārvāñ tak aa ga.e haiñ

makan se la-makan tak aa gae hain

kahan se hum kahan tak aa gae hain

jahan jalte hain par hosh-o-KHirad ke

junun mein hum wahan tak aa gae hain

bhaDak uTThi hai kaisi aatish-e-gul

sharare aashiyan tak aa gae hain

KHulus-e-dosti par marne wale

hayat-e-jawidan tak aa gae hain

hamari gum-rahi manzil nishan hai

tajassus mein kahan tak aa gae hain

wahan dil mein mohabbat ki kami hai

jahan shikwe zaban tak aa gae hain

tamasha-e-bahaar-e-gul ki shaida

bahaar-e-gul-ruKHan tak aa gae hain

maqam apna nahin malum lekin

jahan tum ho wahan tak aa gae hain

kisi ke jalwa-ha-e-hairat-angez

nazar ke imtihan tak aa gae hain

na pahunche KHana-e-dil ke makin tak

zamin se aasman tak aa gae hain

guzar kar hum KHudi wahm-o-guman se

KHuda jaane kahan tak aa gae hain

'rishi' manzil nahin ab dur hum se

ghubar-e-karwan tak aa gae hain