مکاں سے لا مکاں تک آ گیا ہوں

مکاں سے لا مکاں تک آ گیا ہوں

خیالوں میں کہاں تک آ گیا ہوں

گزر کر میں زوال زندگی سے

عروج داستاں تک آ گیا ہوں

ترے ہونٹوں کی جنبش کہہ رہی ہے

کہ میں تیری زباں تک آ گیا ہوں

وہاں تک ہے مری اب حکمرانی

ترے اندر جہاں تک آ گیا ہوں

گزرتے وقت میں کچھ دن ٹھہر کر

میں عمر جاوداں تک آ گیا ہوں

در و دیوار تک وحشت زدہ ہیں

حقیقت میں گماں تک آ گیا ہوں

میں اپنے آپ سے ملنے کی خاطر

ہجوم دوستاں تک آ گیا ہوں

پلٹنا اب کہاں ممکن ہے عاصمؔ

میں خطرے کے نشاں تک آ گیا ہوں