makan se la-makan tak aa gaya hun

makāñ se lā-makāñ tak aa gayā huuñ

ḳhayāloñ meñ kahāñ tak aa gayā huuñ

guzar kar maiñ zavāl-e-zindagī se

urūj-e-dāstāñ tak aa gayā huuñ

tire hoñToñ kī jumbish kah rahī hai

ki maiñ terī zabāñ tak aa gayā huuñ

vahāñ tak hai mirī ab hukmrānī

tire andar jahāñ tak aa gayā huuñ

guzarte vaqt meñ kuchh din Thahar kar

maiñ umr-e-jāvedāñ tak aa gayā huuñ

dar-o-dīvār tak vahshat-zada haiñ

haqīqat meñ gumāñ tak aa gayā huuñ

maiñ apne aap se milne kī ḳhātir

hujūm-e-dostāñ tak aa gayā huuñ

palaTnā ab kahāñ mumkin hai 'āsim'

maiñ ḳhatre ke nishāñ tak aa gayā huuñ

makan se la-makan tak aa gaya hun

KHayalon mein kahan tak aa gaya hun

guzar kar main zawal-e-zindagi se

uruj-e-dastan tak aa gaya hun

tere honTon ki jumbish kah rahi hai

ki main teri zaban tak aa gaya hun

wahan tak hai meri ab hukmrani

tere andar jahan tak aa gaya hun

guzarte waqt mein kuchh din Thahar kar

main umr-e-jawedan tak aa gaya hun

dar-o-diwar tak wahshat-zada hain

haqiqat mein guman tak aa gaya hun

main apne aap se milne ki KHatir

hujum-e-dostan tak aa gaya hun

palaTna ab kahan mumkin hai 'asim'

main KHatre ke nishan tak aa gaya hun