makDi ke jalon mein kab se qaid hain raushan-dan mare

makḌī ke jāloñ meñ kab se qaid haiñ raushan-dān mire

haa.e kyā socheñge ghar ko dekh ke kal mehmān mire

ab ke baras to dil kī zamīñ par aag falak se barsī hai

fikr kī gandum ke dānoñ se ḳhālī haiñ khaliyān mire

merī zabāñ par maslahatoñ ke pahre haiñ to phir kyā hai

haq ke alam-bardār haiñ ab bhī mazdūr o dahqān mire

aaj hisār-e-dār-o-rasan meñ huuñ par aane vaalā din

shahr kī dīvāroñ par chaspāñ dekhegā farmān mire

shakl-o-shabāhat meñ be-shak kuchh farq zarā sā thā varna

the to masīhā bhī insān aur qātil bhī insān mire

bar-sar-e-ām iqrār agar nā-mumkin hai to yūñhī sahī

kam-az-kam idrāk to kar le gun be-shak mat maan mire

kal 'kausar' mere āñgan meñ raqs-e-bahārāñ thā lekin

aaj taraste haiñ kāġhaz ke phūloñ ko gul-dān mire

makDi ke jalon mein kab se qaid hain raushan-dan mere

hae kya sochenge ghar ko dekh ke kal mehman mere

ab ke baras to dil ki zamin par aag falak se barsi hai

fikr ki gandum ke danon se KHali hain khaliyan mere

meri zaban par maslahaton ke pahre hain to phir kya hai

haq ke alam-bardar hain ab bhi mazdur o dahqan mere

aaj hisar-e-dar-o-rasan mein hun par aane wala din

shahr ki diwaron par chaspan dekhega farman mere

shakl-o-shabahat mein be-shak kuchh farq zara sa tha warna

the to masiha bhi insan aur qatil bhi insan mere

bar-sar-e-am iqrar agar na-mumkin hai to yunhi sahi

kam-az-kam idrak to kar le gun be-shak mat man mere

kal 'kausar' mere aangan mein raqs-e-bahaaran tha lekin

aaj taraste hain kaghaz ke phulon ko gul-dan mere