maKHluq hun ya Khaaliq-e-maKHluq-numa hun

maḳhlūq huuñ yā ḳhāliq-e-maḳhlūq-numā huuñ

ma.alūm nahīñ mujh ko ki maiñ kaun huuñ kyā huuñ

huuñ shāhid-e-tanzīh ke ruḳhsār kā parda

yā ḳhud hī mushāhid huuñ ki parde meñ chhupā huuñ

hai mujh se garebān-e-gul-e-sub.h mo.attar

maiñ itr-e-nasīm-e-chaman o bād-e-sabā huuñ

gosh-e-shunvā ho to mire ramz ko samjhe

haq ye hai ki maiñ sāz-e-haqīqat kī navā huuñ

hastī ko mirī hastī-e-ālam na samajhnā

huuñ hast to par hastī-e-ālam se judā huuñ

huuñ sīna-e-ushshāq meñ soz-e-jigar-o-dil

aur dīda-e-māshūqāñ meñ kyā nāz-o-adā huuñ

ye kyā hai ki mujh par mirā uqda nahīñ khultā

har-chand ki ḳhud uqda o ḳhud uqda-kushā huuñ

ai 'mus.hafī' shāneñ haiñ mirī jalvagarī meñ

har rañg meñ maiñ maz.har-e-āsār-e-ḳhudā huuñ

maKHluq hun ya KHaliq-e-maKHluq-numa hun

malum nahin mujh ko ki main kaun hun kya hun

hun shahid-e-tanzih ke ruKHsar ka parda

ya KHud hi mushahid hun ki parde mein chhupa hun

hai mujh se gareban-e-gul-e-subh moattar

main itr-e-nasim-e-chaman o baad-e-saba hun

gosh-e-shunwa ho to mere ramz ko samjhe

haq ye hai ki main saz-e-haqiqat ki nawa hun

hasti ko meri hasti-e-alam na samajhna

hun hast to par hasti-e-alam se juda hun

hun sina-e-ushshaq mein soz-e-jigar-o-dil

aur dida-e-mashuqan mein kya naz-o-ada hun

ye kya hai ki mujh par mera uqda nahin khulta

har-chand ki KHud uqda o KHud uqda-kusha hun

ai 'mushafi' shanen hain meri jalwagari mein

har rang mein main mazhar-e-asar-e-KHuda hun