مخمور ادائے ساقی ہے محروم دل ناکام نہیں

مخمور ادائے ساقی ہے محروم دل ناکام نہیں

کھنچ آئی ہے میرے ساغر میں وہ مے جو رہین جام نہیں

اے قدر شناس جنس گراں بس ایک نظر ہے قیمت دل

یوں مفت لٹائے دیتے ہیں کچھ سود و زیاں سے کام نہیں

دنیائے چمن ہے پیش نظر پھرتا ہے سماں آنکھوں میں وہی

ہم لاکھ رہیں پابند قفس کچھ دل تو اسیر دام نہیں

کیوں داغ لہو کے دھوتے ہو کیوں زینت دامن کھوتے ہو

بے کار پریشاں ہوتے ہو تم پر تو کوئی الزام نہیں

وہ محو تغافل سنتا ہے ہم کہتے ہیں دل کا افسانہ

کچھ باتیں ہیں بہکی بہکی سی آغاز نہیں انجام نہیں

ہے کس کا جگر یہ درد سہے ہے تیر نظر کی تاب کسے

مخصوص ہے میرے دل کے لیے یہ لطف خلش کچھ عام نہیں

یا ہم ہی نہیں شایان جفا یا اس کو نہیں ہے قدر وفا

اس بزم میں کیفیؔ ورنہ کوئی محروم نہیں ناکام نہیں