مکین گھر سے نکل کر ہی خوش ہوئے ہوں گے

مکین گھر سے نکل کر ہی خوش ہوئے ہوں گے

پرانے شہر کے رستے نئے بنے ہوں گے

نئے ظروف میں ڈھلنا کسے نصیب ہوا

مگر وہ لوگ جو مٹی میں مل گئے ہوں گے

ادھورے خواب بھی کتنی بڑی اذیت ہیں

تمام عمر جنہیں دیکھتے رہے ہوں گے

جنہیں جنہیں بھی تمہاری کمی رہی ہوگی

بہشت جا کے بھی شکوہ کناں رہے ہوں گے

ہمیں خرید لیا ہوگا پھر کسی نے کہیں

کسی کو مال غنیمت میں مل گئے ہوں گے

وہ احترام سے خنجر بکف ہوا ہوگا

یہ زخم ہم نے مروت میں لے لیے ہوں گے