malal-e-hijr nahin ranj-e-be-ruKHi bhi nahin

malāl-e-hijr nahīñ ranj-e-be-ruḳhī bhī nahīñ

ki e'tibār ke qābil to zindagī bhī nahīñ

karūñ maiñ ḳhūn-e-tamannā kā kis liye mātam

mire liye ye musībat koī na.ī bhī nahīñ

maiñ phir bhī shām-o-sahar be-qarār rahtā huuñ

agarche ghar meñ kisī chiiz kī kamī bhī nahīñ

mujhe ḳhabar hai ki anjām-e-vasl kyā hogā

isī liye tire milne kī kuchh ḳhushī bhī nahīñ

vahī hai sab kī nigāhoñ kī tanz kā markaz

vo jis makān kī khiḌkī kabhī khulī bhī nahīñ

hue vo log hī shab ke safar pe āmāda

vo jin ke paas asad koī raushnī bhī nahīñ

malal-e-hijr nahin ranj-e-be-ruKHi bhi nahin

ki e'tibar ke qabil to zindagi bhi nahin

karun main KHun-e-tamanna ka kis liye matam

mere liye ye musibat koi nai bhi nahin

main phir bhi sham-o-sahar be-qarar rahta hun

agarche ghar mein kisi chiz ki kami bhi nahin

mujhe KHabar hai ki anjam-e-wasl kya hoga

isi liye tere milne ki kuchh KHushi bhi nahin

wahi hai sab ki nigahon ki tanz ka markaz

wo jis makan ki khiDki kabhi khuli bhi nahin

hue wo log hi shab ke safar pe aamada

wo jin ke pas asad koi raushni bhi nahin