malal hai meri fikron ke aas-pas abhi

malāl hai mirī fikroñ ke ās-pās abhī

udaas rahne de ai dil mujhe udaas abhī

mujhe to saare zamāne kī fikr karnī hai

tumhīñ to ho mirā ā.īna-e-qayās abhī

vo kaise koī shikāyat zabān par laa.eñ

jinhoñ ne dekh liyā hai tumheñ udaas abhī

hamāre baad kahāñ aasrā milā us ko

taḌap rahī hai ġham-o-dard kī asaas abhī

chipak gayā thā achānak laboñ se aa ke mire

sharāb jaisā mahaktā huā gilās abhī

diloñ ke fāsle kahte haiñ maiñ kahūñ na kahūñ

koī bhī shaḳhs nahīñ hai kisī ke paas abhī

mire aziiz na ro.eñ abhī sar-e-bālīñ

ki hai mujhī ko mirī zindagī kī aas abhī

bañdhāne aa.ī thī shāyad hazār ummīdeñ

tumhārī yaad jo aa.ī thī mere paas abhī

abhī kahāñ sitam-o-jaur meñ kamī 'manzil'

kahāñ huā hai na.e daur kā vikās abhī

malal hai meri fikron ke aas-pas abhi

udas rahne de ai dil mujhe udas abhi

mujhe to sare zamane ki fikr karni hai

tumhin to ho mera aaina-e-qayas abhi

wo kaise koi shikayat zaban par laen

jinhon ne dekh liya hai tumhein udas abhi

hamare baad kahan aasra mila us ko

taDap rahi hai gham-o-dard ki asas abhi

chipak gaya tha achanak labon se aa ke mere

sharab jaisa mahakta hua gilas abhi

dilon ke fasle kahte hain main kahun na kahun

koi bhi shaKHs nahin hai kisi ke pas abhi

mere aziz na roen abhi sar-e-baalin

ki hai mujhi ko meri zindagi ki aas abhi

bandhane aai thi shayad hazar ummiden

tumhaari yaad jo aai thi mere pas abhi

abhi kahan sitam-o-jaur mein kami 'manzil'

kahan hua hai nae daur ka wikas abhi