malal hote hue dil pe kuchh malal nahin

malāl hote hue dil pe kuchh malāl nahīñ

ḳhayāl-e-dost se achchhā koī ḳhayāl nahīñ

jise zavāl na ho vo koī kamāl nahīñ

kamāl-e-ġham ko hamāre magar zavāl nahīñ

jafā.eñ kar ke jo vo sust sust baiThe haiñ

unheñ malāl ye hai mujh ko kuchh malāl nahīñ

ye kyā nahīñ nigah-e-fitna-sāz terī kamī

hamāre jazba-e-ġham meñ ab ishti.āl nahīñ

kaho ġhamoñ se ki be-fikr ab diloñ meñ raheñ

ḳhushī kā aaj kī duniyā meñ ehtimāl nahīñ

ye aur baat taras hī na ho kisī dil meñ

chhupā huā to zamāne se merā haal nahīñ

girī jo barq to apnā banā rahā hai mujhe

ye kyā hai 'ashk' agar bāġhbāñ kī chaal nahīñ

malal hote hue dil pe kuchh malal nahin

KHayal-e-dost se achchha koi KHayal nahin

jise zawal na ho wo koi kamal nahin

kamal-e-gham ko hamare magar zawal nahin

jafaen kar ke jo wo sust sust baiThe hain

unhen malal ye hai mujh ko kuchh malal nahin

ye kya nahin nigah-e-fitna-saz teri kami

hamare jazba-e-gham mein ab ishtial nahin

kaho ghamon se ki be-fikr ab dilon mein rahen

KHushi ka aaj ki duniya mein ehtimal nahin

ye aur baat taras hi na ho kisi dil mein

chhupa hua to zamane se mera haal nahin

giri jo barq to apna bana raha hai mujhe

ye kya hai 'ashk' agar baghban ki chaal nahin