ممتا بھری آواز سنانے نہیں آتے

ممتا بھری آواز سنانے نہیں آتے

خوابوں میں بھی بچپن کے زمانے نہیں آتے

ہم وقت پہ دیتے ہیں سوالوں کے جوابات

بے وقت ہمیں ڈھول بجانے نہیں آتے

احساس کی دولت سے نوازا گیا جب سے

آنکھوں میں مری خواب سہانے نہیں آتے

ان سے نہ ملاتا ہمیں احساس انا کا

خود ہی وہ اگر ہاتھ ملانے نہیں آتے

ہم گردش افلاک کا کرتے ہیں تدارک

پلکوں پہ ہمیں اشک سجانے نہیں آتے

اے وقت کی رفتار ٹھہر اور ہمیں دیکھ

ہم دہر میں سر اپنا کھپانے نہیں آتے

جن کے لیے مخصوص ہوا لفظ وفا کا

واپس لب دریا سے وہ شانے نہیں آتے

ہم جذبۂ تعمیر سے رکھتے ہیں تعلق

بنتی ہوئی دیوار گرانے نہیں آتے

اتنا تو نہ ٹوٹا تھا عتیقؔ ان سے تعلق

کیوں یاد مجھے یار پرانے نہیں آتے