mamta-bhari aawaz sunane nahin aate

mamtā-bharī āvāz sunāne nahīñ aate

ḳhvāboñ meñ bhī bachpan ke zamāne nahīñ aate

ham vaqt pe dete haiñ savāloñ ke javābāt

be-vaqt hameñ Dhol bajāne nahīñ aate

ehsās kī daulat se navāzā gayā jab se

āñkhoñ meñ mirī ḳhvāb suhāne nahīñ aate

un se na milātā hameñ ehsās anā kā

ḳhud hī vo agar haath milāne nahīñ aate

ham gardish-e-aflāk kā karte haiñ tadāruk

palkoñ pe hameñ ashk sajāne nahīñ aate

ai vaqt kī raftār Thahar aur hameñ dekh

ham dahr meñ sar apnā khapāne nahīñ aate

jin ke liye maḳhsūs huā lafz vafā kā

vāpas lab-e-dariyā se vo shāne nahīñ aate

ham jazba-e-tā’mīr se rakhte haiñ ta'alluq

bantī huī dīvār girāne nahīñ aate

itnā to na TuuTā thā 'atīq' un se ta'alluq

kyoñ yaad mujhe yaar purāne nahīñ aate

mamta-bhari aawaz sunane nahin aate

KHwabon mein bhi bachpan ke zamane nahin aate

hum waqt pe dete hain sawalon ke jawabaat

be-waqt hamein Dhol bajaane nahin aate

ehsas ki daulat se nawaza gaya jab se

aankhon mein meri KHwab suhane nahin aate

un se na milata hamein ehsas ana ka

KHud hi wo agar hath milane nahin aate

hum gardish-e-aflak ka karte hain tadaruk

palkon pe hamein ashk sajaane nahin aate

ai waqt ki raftar Thahar aur hamein dekh

hum dahr mein sar apna khapane nahin aate

jin ke liye maKHsus hua lafz wafa ka

wapas lab-e-dariya se wo shane nahin aate

hum jazba-e-ta’mir se rakhte hain ta'alluq

banti hui diwar girane nahin aate

itna to na TuTa tha 'atiq' un se ta'alluq

kyon yaad mujhe yar purane nahin aate