man ke mandir mein hai udasi kyun

man ke mandir meñ hai udāsī kyuuñ

nahīñ aa.ī vo dev-dāsī kyuuñ

abr barsā baras ke khul bhī gayā

rah ga.ī phir zamīn pyāsī kyuuñ

ik ḳhushī kā ḳhayāl aate hī

chhā ga.ī zehn par udāsī kyuuñ

zindagī bevafā azal se hai

phir bhī lagtī hai bā-vafā sī kyuuñ

aisī fitrat-shikār-duniyā meñ

itnī insān-nā-shanāsī kyuuñ

kyuuñ nahīñ ek zāhir-o-bātin

aadmī ho ga.e siyāsī kyuuñ

ġham-gusārī ḳhulūs mehr-o-vafā

ho ga.e haiñ ye phuul baasī kyuuñ

ik haqīqat hai jab vatan kī talab

phir mohabbat kareñ qayāsī kyuuñ

ye mulāqāt ye sukūt ye shaam

ibtidā meñ ye intihā sī kyuuñ

milne vaale bichhaḌ bhī sakte haiñ

terī āñkhoñ meñ ye udāsī kyuuñ

man ke mandir mein hai udasi kyun

nahin aai wo dew-dasi kyun

abr barsa baras ke khul bhi gaya

rah gai phir zamin pyasi kyun

ek KHushi ka KHayal aate hi

chha gai zehn par udasi kyun

zindagi bewafa azal se hai

phir bhi lagti hai ba-wafa si kyun

aisi fitrat-shikar-duniya mein

itni insan-na-shanasi kyun

kyun nahin ek zahir-o-baatin

aadmi ho gae siyasi kyun

gham-gusari KHulus mehr-o-wafa

ho gae hain ye phul basi kyun

ek haqiqat hai jab watan ki talab

phir mohabbat karen qayasi kyun

ye mulaqat ye sukut ye sham

ibtida mein ye intiha si kyun

milne wale bichhaD bhi sakte hain

teri aankhon mein ye udasi kyun