manata hun magar waise hi bas ruThe hue se hain

manātā huuñ magar vaise hī bas rūThe hue se haiñ

vo shāyad tark-e-ulfat kī qasam khaa.e hue se haiñ

tumhāre hijr ke sadmoñ ne hālat ye banā dī hai

na ham so.e hue se haiñ na ham jaage hue se haiñ

bas itne se samajh lo kū-e-jānāñ ke fazā.el tum

guloñ ke misl hī kāñTe vahāñ mahke hue se haiñ

ai mere sabr zindabād ai merī pyaas zindabād

jo paimāne ki ḳhālī the vo sab chhalke hue se haiñ

mirī parvāz pahle jaisī rif.at kyoñ nahīñ paatī

zarā dekho to kuchh par kyā mire katre hue se haiñ

ba-zāhir aur ba-bātin meñ yahī ik farq hai sāhib

vo mere saath meñ to haiñ magar bichhḌe hue se haiñ

tire dil meñ bhī kyā chāhat ke narm ehsās jaag uTThe

tire andāz āḳhir aaj kyoñ badle hue se haiñ

zarūr un se junūñ-bar-dosh dīvāne ga.e hoñge

pahāḌoñ aur chaTTānoñ pe jo raste hue se haiñ

manata hun magar waise hi bas ruThe hue se hain

wo shayad tark-e-ulfat ki qasam khae hue se hain

tumhaare hijr ke sadmon ne haalat ye bana di hai

na hum soe hue se hain na hum jage hue se hain

bas itne se samajh lo ku-e-jaanan ke fazael tum

gulon ke misl hi kanTe wahan mahke hue se hain

ai mere sabr zindabaad ai meri pyas zindabaad

jo paimane ki KHali the wo sab chhalke hue se hain

meri parwaz pahle jaisi rifat kyon nahin pati

zara dekho to kuchh par kya mere katre hue se hain

ba-zahir aur ba-baatin mein yahi ek farq hai sahib

wo mere sath mein to hain magar bichhDe hue se hain

tere dil mein bhi kya chahat ke narm ehsas jag uTThe

tere andaz aaKHir aaj kyon badle hue se hain

zarur un se junun-bar-dosh diwane gae honge

pahaDon aur chaTTanon pe jo raste hue se hain