mandi mein mahnga saman sanbhaale hum

mandī meñ mahñgā sāmān sañbhāle ham

baiThe haiñ dil meñ armān sañbhāle ham

āñkhoñ meñ sailāb kī gardish jaarī hai

aur siine meñ haiñ tūfān sañbhāle ham

hoñToñ par muskān sajā.e baiThe haiñ

kitne hoñToñ kī muskān sañbhāle ham

ulfat ke bāzār meñ bechī bīnā.ī

lauTe haiñ phir bhī nuqsān sañbhāle ham

qasr mubārak ho tum ko ye ḳhushiyoñ kā

achchhe se haiñ dil vīrān sañbhāle ham

majbūrī hī bāzīgar kī himmat hai

rassī par chalte haiñ dhyān sañbhāle ham

matlab kī is duniyā meñ bhī jiite haiñ

jaise taise apnī jaan sañbhāle ham

zard hue pattoñ kī qismat kyā āḳhir

Tuut ga.e shāḳhoñ kā maan sañbhāle ham

us ke kūche meñ har shaḳhs ḳhudā thā so

lauT aa.e apne ausān sañbhāle ham

mazlūmoñ kī chīḳheñ sunte haiñ 'āzād'

bahroñ kī bastī meñ kaan sañbhāle ham

mandi mein mahnga saman sanbhaale hum

baiThe hain dil mein arman sanbhaale hum

aankhon mein sailab ki gardish jari hai

aur sine mein hain tufan sanbhaale hum

honTon par muskan sajae baiThe hain

kitne honTon ki muskan sanbhaale hum

ulfat ke bazar mein bechi binai

lauTe hain phir bhi nuqsan sanbhaale hum

qasr mubarak ho tum ko ye KHushiyon ka

achchhe se hain dil viran sanbhaale hum

majburi hi bazigar ki himmat hai

rassi par chalte hain dhyan sanbhaale hum

matlab ki is duniya mein bhi jite hain

jaise taise apni jaan sanbhaale hum

zard hue patton ki qismat kya aaKHir

Tut gae shaKHon ka man sanbhaale hum

us ke kuche mein har shaKHs KHuda tha so

lauT aae apne ausan sanbhaale hum

mazlumon ki chiKHen sunte hain 'azad'

bahron ki basti mein kan sanbhaale hum