mannat-guzar dida-e-giryan na tha kabhi

mannat-guzār dīda-e-giryāñ na thā kabhī

ye dil marīz-e-jalva-e-jānāñ na thā kabhī

us ko bhī thā hujūm-e-tajallī se ehtiyāt

maiñ bhī harīs-e-lutf-e-charāġhāñ na thā kabhī

chupke se aaj vo bhī tah-e-ḳhāk so ga.e

jin ko ḳhayāl-e-gor-e-ġharībāñ na thā kabhī

jo mo'atabar huā hai nigāh-e-jamāl meñ

mahv-e-tavāf-e-sham-e-farozāñ na thā kabhī

ai be-charāġh suunī havelī ke bāsiyo

kyā tum ko ḳhauf-e-gardish-e-daurāñ na thā kabhī

kyoñ kam huā hai kūcha-e-qātil meñ e.atibār

kyā maiñ asīr-e-gesū-e-ḳhūbāñ na thā kabhī

nūr-e-hirā ke faiz se pahle to ai hayāt

irfān-e-zāt kā tujhe irfāñ na thā kabhī

simTā huā huuñ sharm se mahshar kī bhiiḌ meñ

dil meñ ḳhayāl-e-daftar-e-isyāñ na thā kabhī

rakkhī mire zamīr ne āb-e-anā kī laaj

maiñ zer-e-bār-e-ḳhvāja-o-sultāñ na thā kabhī

'bazmī' tumhāre daur kī millat-faroshiyāñ

itnā to be-zamīr musalmāñ na thā kabhī

mannat-guzar dida-e-giryan na tha kabhi

ye dil mariz-e-jalwa-e-jaanan na tha kabhi

us ko bhi tha hujum-e-tajalli se ehtiyat

main bhi haris-e-lutf-e-charaghan na tha kabhi

chupke se aaj wo bhi tah-e-KHak so gae

jin ko KHayal-e-gor-e-ghariban na tha kabhi

jo mo'atabar hua hai nigah-e-jamal mein

mahw-e-tawaf-e-sham-e-farozan na tha kabhi

ai be-charagh suni haweli ke basiyo

kya tum ko KHauf-e-gardish-e-dauran na tha kabhi

kyon kam hua hai kucha-e-qatil mein eatibar

kya main asir-e-gesu-e-KHuban na tha kabhi

nur-e-hira ke faiz se pahle to ai hayat

irfan-e-zat ka tujhe irfan na tha kabhi

simTa hua hun sharm se mahshar ki bhiD mein

dil mein KHayal-e-daftar-e-isyan na tha kabhi

rakkhi mere zamir ne aab-e-ana ki laj

main zer-e-bar-e-KHwaja-o-sultan na tha kabhi

'bazmi' tumhaare daur ki millat-faroshiyan

itna to be-zamir musalman na tha kabhi