mansab-e-ishq ka KHayal rahe

mansab-e-ishq kā ḳhayāl rahe

zaḳhm kā silsila bahāl rahe

ye bhī fursat na thī ki dam letā

yuuñ ta.āqub meñ māh-o-sāl rahe

ham sar-e-ā.ina rahe jab tak

sūrat-e-ashk infi.āl rahe

apne a.asāb mujtam.a rakhnā

dasht-e-ġham hai zarā ḳhayāl rahe

tāb-e-guftār jab mayassar hai

zer-e-lab kyoñ koī savāl rahe

merī āñkheñ raheñ raheñ na raheñ

tū rahe aur tirā jamāl rahe

misl-e-bīnā.ī merī āñkhoñ meñ

umr bhar us ke ḳhadd-o-ḳhāl rahe

mansab-e-ishq ka KHayal rahe

zaKHm ka silsila bahaal rahe

ye bhi fursat na thi ki dam leta

yun taaqub mein mah-o-sal rahe

hum sar-e-aina rahe jab tak

surat-e-ashk infial rahe

apne aasab mujtama rakhna

dasht-e-gham hai zara KHayal rahe

tab-e-guftar jab mayassar hai

zer-e-lab kyon koi sawal rahe

meri aankhen rahen rahen na rahen

tu rahe aur tera jamal rahe

misl-e-binai meri aankhon mein

umr bhar us ke KHadd-o-KHal rahe