mansab ki fikr hai na hamein mal-o-jah ki

mansab kī fikr hai na hameñ māl-o-jāh kī

shāhī se kuchh ġharaz hai na parvā hai shaah kī

jis samt ko huzūr ne tirchhī nigāh kī

das biis kyā hazāroñ kī hālat tabāh kī

jannat meñ jā ke ham ne jo rone se raah kī

vaa.iz batā ye baat bhī kyā hai gunāh kī

ġhairoñ se tark kījiye yak-laḳht irtibāt

sūrat yahī hai aap ke mere nibāh kī

vaa.iz tumhāre vasf-e-sharāb-e-tahūr par

aatī hai botaloñ se sadā qāh-qāh kī

hoñ bāda-kash sharīk agar hāl-qāl meñ

raunaq ho ḳhuub shaiḳh tirī ḳhānqāh kī

shāne kā ruup bhar dil-e-sad-chāk ne mire

sau pech se hai kūcha-e-gesū meñ raah kī

jo chāho jaur-o-zulm-o-sitam tum yahāñ karo

koī sunegā kuchh to vahāñ dād-ḳhvāh kī

itnā samajh lo tum ki ḳhudā ḳhud aliim hai

hājat mujhe na hogī buto kuchh gavāh kī

kyā sher dhūm-dhām ke likhte haiñ ai 'diler'

aatī hai har taraf se sadā vaah vaah kī

mansab ki fikr hai na hamein mal-o-jah ki

shahi se kuchh gharaz hai na parwa hai shah ki

jis samt ko huzur ne tirchhi nigah ki

das bis kya hazaron ki haalat tabah ki

jannat mein ja ke hum ne jo rone se rah ki

waiz bata ye baat bhi kya hai gunah ki

ghairon se tark kijiye yak-laKHt irtibaat

surat yahi hai aap ke mere nibah ki

waiz tumhaare wasf-e-sharab-e-tahur par

aati hai botalon se sada qah-qah ki

hon baada-kash sharik agar haal-qal mein

raunaq ho KHub shaiKH teri KHanqah ki

shane ka rup bhar dil-e-sad-chaak ne mere

sau pech se hai kucha-e-gesu mein rah ki

jo chaho jaur-o-zulm-o-sitam tum yahan karo

koi sunega kuchh to wahan dad-KHwah ki

itna samajh lo tum ki KHuda KHud alim hai

hajat mujhe na hogi buto kuchh gawah ki

kya sher dhum-dham ke likhte hain ai 'diler'

aati hai har taraf se sada wah wah ki