mansab se mohabbat ki subuk-dosh hua main

mansab se mohabbat kī subuk-dosh huā maiñ

āvāz lagāte raho ḳhāmosh huā maiñ

is baar vo sho'la na.e andāz se bhaḌkā

ik aan meñ sau-bār siyah-posh huā maiñ

īmān kā fuqdān to pahle kī tarah thā

ik nā'ra-e-takbīr se pur-josh huā maiñ

kuchh naqs thā tauba meñ usī kī to huā ye

yaad aa gayā yak-laḳht farāmosh huā maiñ

is baar tire jism kī ḳhushbū hī alag thī

patthar huā jaatā thā ham-āġhosh huā maiñ

isrār thā ai’lān-e-mohabbat pe sabhī ko

is darja baḌhā shor girāñ-gosh huā maiñ

mansab se mohabbat ki subuk-dosh hua main

aawaz lagate raho KHamosh hua main

is bar wo sho'la nae andaz se bhaDka

ek aan mein sau-bar siyah-posh hua main

iman ka fuqdan to pahle ki tarah tha

ek na'ra-e-takbir se pur-josh hua main

kuchh naqs tha tauba mein usi ki to hua ye

yaad aa gaya yak-laKHt faramosh hua main

is bar tere jism ki KHushbu hi alag thi

patthar hua jata tha ham-aghosh hua main

israr tha ai’lan-e-mohabbat pe sabhi ko

is darja baDha shor giran-gosh hua main