منسوب ان سے آج مری ذات ہو گئی

منسوب ان سے آج مری ذات ہو گئی

یعنی حیات نو کی شروعات ہو گئی

ناکامیٔ محبت جاناں کے ساتھ ساتھ

خود زندگی بھی نذر خرابات ہو گئی

ان کی طرف سے جو بھی مجھے غم عطا ہوا

میرے لیے خوشی کی وہ سوغات ہو گئی

پھر دل میں اس کی یاد کے بادل امڈ پڑے

پھر آنسوؤں کی آنکھ سے برسات ہو گئی

محروم ہو گیا ہوں پیام وصال سے

کیا جانے کیا خطا ہوئی کیا بات ہو گئی

شاداںؔ مری حیات بھی پر نور تھی مگر

کیا جانے کب یہ پیکر ظلمات ہو گئی