manzar-e-hijr aisa chubha rah gaya

manzar-e-hijr aisā chubhā rah gayā

apnī āñkhoñ ko maiñ nochtā rah gayā

koī ġham rahnumā.ī ko aaya nahīñ

ek aañsū bhaTaktā huā rah gayā

bahte bahte nadī tham ga.ī ashk kī

ek chehra magar tairtā rah gayā

bose nadiyoñ ke bhī kaam aa.e nahīñ

pyaas se lab sulagtā huā rah gayā

us ne hāthoñ ko jhaTkā mire is tarah

apne hāthoñ ko maiñ chūmtā rah gayā

phuul ne kar liyā tai safar miil kā

aur patthar lahū thūktā rah gayā

ham ne nazroñ meñ ḳhud beḌiyāñ Daal diiñ

ek jalva hameñ khīñchtā rah gayā

is qarīne se kuchlā gayā merā dil

naqsh har aah par naqsh-e-pā rah gayā

ḳhūn-e-dil par mire us kā dil aa gayā

haath maltā vo rang-e-hinā rah gayā

jaane tahrīr kyā kah ga.ī jo qalam

ungliyoñ ko mirī chūmtā rah gayā

dastakeñ de ke chaltī banī ḳhāmushī

dar mirā raat bhar boltā rah gayā

aa ke āñkhoñ meñ aTkī rahī merī jaañ

aur maiñ rāsta dekhtā rah gayā

vo parī-zād thī haath aa.ī nahīñ

aur 'shahbāz' par mārtā rah gayā

manzar-e-hijr aisa chubha rah gaya

apni aankhon ko main nochta rah gaya

koi gham rahnumai ko aaya nahin

ek aansu bhaTakta hua rah gaya

bahte bahte nadi tham gai ashk ki

ek chehra magar tairta rah gaya

bose nadiyon ke bhi kaam aae nahin

pyas se lab sulagta hua rah gaya

us ne hathon ko jhaTka mere is tarah

apne hathon ko main chumta rah gaya

phul ne kar liya tai safar mil ka

aur patthar lahu thukta rah gaya

hum ne nazron mein KHud beDiyan Dal din

ek jalwa hamein khinchta rah gaya

is qarine se kuchla gaya mera dil

naqsh har aah par naqsh-e-pa rah gaya

KHun-e-dil par mere us ka dil aa gaya

hath malta wo rang-e-hina rah gaya

jaane tahrir kya kah gai jo qalam

ungliyon ko meri chumta rah gaya

dastaken de ke chalti bani KHamushi

dar mera raat bhar bolta rah gaya

aa ke aankhon mein aTki rahi meri jaan

aur main rasta dekhta rah gaya

wo pari-zad thi hath aai nahin

aur 'shahbaz' par marta rah gaya