منظر شام الم بھی نہیں دیکھے جاتے

منظر شام الم بھی نہیں دیکھے جاتے

کیا ستم ہے کہ ستم بھی نہیں دیکھے جاتے

اہل غم اپنی طبیعت سے ہیں مجبور بہت

تیرے انداز کرم بھی نہیں دیکھے جاتے

اتنی عجلت سے جبیں جھکتی ہے سجدے کے لئے

آنکھ سے نقش قدم بھی نہیں دیکھے جاتے

کم نگاہی بھی مصیبت ہے شریفوں کے لئے

بند مٹھی کے بھرم بھی نہیں دیکھے جاتے

تبصرہ کرتے ہیں کیوں لوگ مری حالت پر

جانے کیوں ان کے کرم بھی نہیں دیکھے جاتے

ان کی منزل کی طرف بڑھتے ہیں جس دم اخترؔ

راہ میں دیر و حرم بھی نہیں دیکھے جاتے