منظر صبح بہاراں نہیں دیکھا جاتا

منظر صبح بہاراں نہیں دیکھا جاتا

چاک دامان گلستاں نہیں دیکھا جاتا

المدد جوش جنوں جذبۂ وحشت فریاد

مجھ سے اب خواب پریشاں نہیں دیکھا جاتا

نغمہ سنجان چمن مہر بہ لب آج بھی ہیں

یہ سماں وقت بہاراں نہیں دیکھا جاتا

باغباں میں نہیں کہتا کہ ہے کانٹوں کا قصور

تجھ سے ہر گل کا گریباں نہیں دیکھا جاتا

ہر نظر یاس میں ڈوبی نہیں دیکھی جاتی

ہر نفس شعلہ بداماں نہیں دیکھا جاتا

دیکھ سکتا تو ہوں بدلے ہوئے حالات مگر

حال بربادیٔ انساں نہیں دیکھا جاتا