manzar kai barish se zamin par utar aae

manzar ka.ī bārish se zamīñ par utar aa.e

peḌoñ kī tarah logoñ ke chehre nikhar aa.e

mohkam na zamīñ se ho ta.alluq hī jaḌoñ kā

us peḌ pe aa.e bhī to kaise samar aa.e

paspā.ī nahīñ hai to hai pachhtāvā yaqīnan

ham log jo manzil se bhī aage guzar aa.e

shāyad kisī mahrūmī kā iz.hār huā hai

mazmūn mohabbat ke jo sheroñ meñ dhar aa.e

maḳhlūq samajh baiThe na is ko koī tairāk

jo sat.h pe paanī kī kabhī laash ubhar aa.e

ho kar nazar-andāz jiyā kab 'valī' terā

kahnā vo sarāpā-e-tajassus agar aa.e

manzar kai barish se zamin par utar aae

peDon ki tarah logon ke chehre nikhar aae

mohkam na zamin se ho talluq hi jaDon ka

us peD pe aae bhi to kaise samar aae

paspai nahin hai to hai pachhtawa yaqinan

hum log jo manzil se bhi aage guzar aae

shayad kisi mahrumi ka izhaar hua hai

mazmun mohabbat ke jo sheron mein dhar aae

maKHluq samajh baiThe na is ko koi tairak

jo sath pe pani ki kabhi lash ubhar aae

ho kar nazar-andaz jiya kab 'wali' tera

kahna wo sarapa-e-tajassus agar aae