manzar meri aankhon mein rahe dasht-e-safar ke

manzar mirī āñkhoñ meñ rahe dasht-e-safar ke

kuchh ret ke Tiile dar-o-dīvār haiñ ghar ke

lahroñ pe mire paañv jame haiñ ki safar meñ

hai shart Thaharnā ki zamīñ paañv se sar ke

tā-umr rahe jis ke liye zarra-e-na-chīz

dekhe vo kabhī kaash bulandī se utar ke

paanī ke ka.ī rañg dhanak meñ haiñ ki tū hai

tasvīr meñ aa.ī hai tirī shakl nikhar ke

dariyā kī tarah arsa-e-gul meñ hai ravāñ kyā

bādal kī tarah dekh havāoñ meñ Thahar ke

patte the kabhī sarsar-e-tūfān meñ TuuTe

taa.ir haiñ ki uḌ jaa.eñ mirī chaap se Dar ke

Duube haiñ vo yuuñ sab ke samundar meñ ki ġham haiñ

sūraj kī chamak aañkh meñ laa.e the jo bhar ke

hasrat hai ki dekhūñ maiñ ubhartā huā sūraj

kis kohar meñ Duube haiñ dar-o-bām sahar ke

manzar meri aankhon mein rahe dasht-e-safar ke

kuchh ret ke Tile dar-o-diwar hain ghar ke

lahron pe mere panw jame hain ki safar mein

hai shart Thaharna ki zamin panw se sar ke

ta-umr rahe jis ke liye zarra-e-na-chiz

dekhe wo kabhi kash bulandi se utar ke

pani ke kai rang dhanak mein hain ki tu hai

taswir mein aai hai teri shakl nikhar ke

dariya ki tarah arsa-e-gul mein hai rawan kya

baadal ki tarah dekh hawaon mein Thahar ke

patte the kabhi sarsar-e-tufan mein TuTe

tair hain ki uD jaen meri chap se Dar ke

Dube hain wo yun sab ke samundar mein ki gham hain

suraj ki chamak aankh mein lae the jo bhar ke

hasrat hai ki dekhun main ubharta hua suraj

kis kohar mein Dube hain dar-o-baam sahar ke