manzar se kabhi dil ke wo haTta hi nahin hai

manzar se kabhī dil ke vo haTtā hī nahīñ hai

ik shahr jo baste hue dekhā hī nahīñ hai

kuchh manzileñ ab apnā pata bhī nahīñ detīñ

aur rāsta aisā hai ki kaTtā hī nahīñ hai

ik naqsh ki ban ban ke bigaḌtā hī rahā hai

ik ḳhvāb ki puurā kabhī hotā hī nahīñ hai

kyā ham pe guzartī hai tumheñ kaise batā.eñ

tum ne to palaT kar kabhī pūchhā hī nahīñ hai

ik umr gañvā.ī hai to phir dil ko milā hai

vo dard ki jis kā koī chāra hī nahīñ hai

ye ishq kī vaadī hai zarā soch samajh lo

is raah pe paañv koī dhartā hī nahīñ hai

DhūñDe se ḳhudā miltā hai insān hai vo to

tum ne use 'shabnam' kabhī DhūñDā hī nahīñ hai

manzar se kabhi dil ke wo haTta hi nahin hai

ek shahr jo baste hue dekha hi nahin hai

kuchh manzilen ab apna pata bhi nahin detin

aur rasta aisa hai ki kaTta hi nahin hai

ek naqsh ki ban ban ke bigaDta hi raha hai

ek KHwab ki pura kabhi hota hi nahin hai

kya hum pe guzarti hai tumhein kaise bataen

tum ne to palaT kar kabhi puchha hi nahin hai

ek umr ganwai hai to phir dil ko mila hai

wo dard ki jis ka koi chaara hi nahin hai

ye ishq ki wadi hai zara soch samajh lo

is rah pe panw koi dharta hi nahin hai

DhunDe se KHuda milta hai insan hai wo to

tum ne use 'shabnam' kabhi DhunDa hi nahin hai