manzar se udhar KHwab ki paspai se aage

manzar se udhar ḳhvāb kī paspā.ī se aage

maiñ dekh rahā huuñ had-e-bīnā.ī se aage

ye 'qais' kī masnad hai so zebā hai usī ko

hai ishq sarāsar mirī dānā.ī se aage

shāyad mire ajdād ko mālūm nahīñ thā

ik baaġh hai is dasht kī ra.anā.ī se aage

sab dekh rahī thī pas-e-dīvār thā jo kuchh

thī chashm-e-tamāshā.ī tamāshā.ī se aage

ham qāfiya-paimā.ī ke chakkar meñ paḌe haiñ

hai sinf-e-ġhazal qāfiya-paimā.ī se aage

ik din jo yūñhī parda-e-aflāk uThāyā

barpā thā tamāshā koī tanhā.ī se aage

mujh kāġhzī kashtī pe nazar kījiye 'āzar'

baḌhtī hai jo lahroñ kī tavānā.ī se aage

manzar se udhar KHwab ki paspai se aage

main dekh raha hun had-e-binai se aage

ye 'qais' ki masnad hai so zeba hai usi ko

hai ishq sarasar meri danai se aage

shayad mere ajdad ko malum nahin tha

ek bagh hai is dasht ki ranai se aage

sab dekh rahi thi pas-e-diwar tha jo kuchh

thi chashm-e-tamashai tamashai se aage

hum qafiya-paimai ke chakkar mein paDe hain

hai sinf-e-ghazal qafiya-paimai se aage

ek din jo yunhi parda-e-aflak uThaya

barpa tha tamasha koi tanhai se aage

mujh kaghzi kashti pe nazar kijiye 'azar'

baDhti hai jo lahron ki tawanai se aage