manzil dikhai de na koi rasta mujhe

manzil dikhā.ī de na koī rāsta mujhe

le aa.e haiñ kahāñ pe mire rahnumā mujhe

ai vaqt phir se denā zarā aa.ina mujhe

hairat se tak rahā hai jahān-e-vafā mujhe

shikva rahā kisī se na koī gila mujhe

tum mil ga.e to saarā jahāñ mil gayā mujhe

maiñ so chalā thā apne takabbur kī chhāñv meñ

achchhā huā jo aap ne chauñkā diyā mujhe

kaise karūñ maiñ dil se judā ab matā’-e-ġham

le de ke ik usī kā to hai aasrā mujhe

duniyā meñ har qadam pe nigāhoñ kī bhiiḌ thī

rah rah ke yaad aayā tirā dekhnā mujhe

ik pyaar kī nazar se yūñhī dekh kar 'kañval'

phir ġham se kar gayā hai koī āshnā mujhe

manzil dikhai de na koi rasta mujhe

le aae hain kahan pe mere rahnuma mujhe

ai waqt phir se dena zara aaina mujhe

hairat se tak raha hai jahan-e-wafa mujhe

shikwa raha kisi se na koi gila mujhe

tum mil gae to sara jahan mil gaya mujhe

main so chala tha apne takabbur ki chhanw mein

achchha hua jo aap ne chaunka diya mujhe

kaise karun main dil se juda ab mata’-e-gham

le de ke ek usi ka to hai aasra mujhe

duniya mein har qadam pe nigahon ki bhiD thi

rah rah ke yaad aaya tera dekhna mujhe

ek pyar ki nazar se yunhi dekh kar 'kanwal'

phir gham se kar gaya hai koi aashna mujhe