manzil-e-ishq mein din raat badal jate hain

manzil-e-ishq meñ din raat badal jaate haiñ

dil badal jaatā hai jazbāt badal jaate haiñ

apnī hastī se jab insān guzar jaatā hai

daf.atan saare maqāmāt badal jaate haiñ

chashm-e-sāqī kā ik adnā sā ishāra hai bahut

zindagī bhar ke ḳhayālāt badal jaate haiñ

dil pe furqat meñ guzartī hai na jaane kyā kyā

tere aa jaane se hālāt badal jaate haiñ

toḌ de parda ki ab maut bhī be-parda huī

aisī hālat meñ hijābāt badal jaate haiñ

jalva-e-sub.h se hotī haiñ umangeñ paidā

shaam aatī hai to jazbāt badal jaate haiñ

saañs ke saath hī rahtī hai javābāt kī aas

dam ukhaḌte hī savālāt badal jaate haiñ

sehr hai yā koī fitna hai ye kyā hai 'ejāz'

āñkhoñ āñkhoñ meñ ishārāt badal jaate haiñ

manzil-e-ishq mein din raat badal jate hain

dil badal jata hai jazbaat badal jate hain

apni hasti se jab insan guzar jata hai

dafatan sare maqamat badal jate hain

chashm-e-saqi ka ek adna sa ishaara hai bahut

zindagi bhar ke KHayalat badal jate hain

dil pe furqat mein guzarti hai na jaane kya kya

tere aa jaane se haalat badal jate hain

toD de parda ki ab maut bhi be-parda hui

aisi haalat mein hijabaat badal jate hain

jalwa-e-subh se hoti hain umangen paida

sham aati hai to jazbaat badal jate hain

sans ke sath hi rahti hai jawabaat ki aas

dam ukhaDte hi sawalat badal jate hain

sehr hai ya koi fitna hai ye kya hai 'ejaz'

aankhon aankhon mein ishaaraat badal jate hain