manzil-e-karb ki thakan oDhe

manzil-e-karb kī thakan oḌhe

so ga.e soḳhta badan oḌhe

bārgāh-e-junūn-o-vahshat meñ

ḳhāmushī hai koī suḳhan oḌhe

bād-e-sarsar qabā-e-shabnam oḌh

ḳhushbū-e-gul hai bāñkpan oḌhe

raat ke saa.e meñ lab-e-dariyā

chāñd vahshat kā ik gahan oḌhe

sabz mausam kī ḳhvāb-gāhoñ meñ

zard patte haiñ ek ban oḌhe

surma.ī shaam ke darīche par

sāya-e-hijr hai kafan oḌhe

ūñghtī hai sabā fasīloñ par

ik kaḌī dhuup kī ghuTan oḌhe

mahv-e-raqsāñ hai dar-ba-dar 'rāshif'

gird sahrāoñ kī pavan oḌhe

manzil-e-karb ki thakan oDhe

so gae soKHta badan oDhe

bargah-e-junun-o-wahshat mein

KHamushi hai koi suKHan oDhe

baad-e-sarsar qaba-e-shabnam oDh

KHushbu-e-gul hai bankpan oDhe

raat ke sae mein lab-e-dariya

chand wahshat ka ek gahan oDhe

sabz mausam ki KHwab-gahon mein

zard patte hain ek ban oDhe

surmai sham ke dariche par

saya-e-hijr hai kafan oDhe

unghti hai saba fasilon par

ek kaDi dhup ki ghuTan oDhe

mahw-e-raqsan hai dar-ba-dar 'rashif'

gird sahraon ki pawan oDhe