manzil-e-KHwab hai aur mahw-e-safar pani hai

manzil-e-ḳhvāb hai aur mahv-e-safar paanī hai

aañkh kyā kholīñ ki tā-hadd-e-nazar paanī hai

aa.ina hai to koī 'aks kahāñ hai is meñ

kyuuñ bahā kar nahīñ le jaatā agar paanī hai

ek ḳhvāhish ki jo sahrā-e-badan se niklī

khīñchtī hai usī jānib ko jidhar paanī hai

paañv uThte haiñ kisī mauj kī jānib lekin

rok letā hai kināra ki Thahar paanī hai

ab bhī bādal to barastā hai par us paar kahīñ

kisht-e-be-āb idhar aur idhar paanī hai

khīñchtā hai koī sayyāra tire pyāsoñ ko

us 'ilāqe meñ jahāñ ḳhāk-basar paanī hai

chashm-e-nam aur dil-e-labrez bahut haiñ mujh ko

ḳhitta-e-ḳhāk hai aur zād-e-safar paanī hai

manzil-e-KHwab hai aur mahw-e-safar pani hai

aankh kya kholin ki ta-hadd-e-nazar pani hai

aaina hai to koi 'aks kahan hai is mein

kyun baha kar nahin le jata agar pani hai

ek KHwahish ki jo sahra-e-badan se nikli

khinchti hai usi jaanib ko jidhar pani hai

panw uThte hain kisi mauj ki jaanib lekin

rok leta hai kinara ki Thahar pani hai

ab bhi baadal to barasta hai par us par kahin

kisht-e-be-ab idhar aur idhar pani hai

khinchta hai koi sayyara tere pyason ko

us 'ilaqe mein jahan KHak-basar pani hai

chashm-e-nam aur dil-e-labrez bahut hain mujh ko

KHitta-e-KHak hai aur zad-e-safar pani hai